A di su ti jutros dica, Marinko moj ?
Pitajte Gospu....Svaki je otiša na svoju bandu. Biće mala otišla u skulu a mali na fakultet.
Je, je...Ma razumin te je, reče šjora File nikako ka šerjasto. Oli je lako danas znat di su ti vlastita dica. Takva su došla vrimena, e ! Ča se tu more ? Dica su jušto ka i raki...Svaki gre di ga je voja i po svoju. Oli se višje išta pitadu mater i otac, ka ča je to bilo u moje vrime ? Ma ke ! Sve je to rebambilo, sinko moj. Skroz te ja razumin....završi ona...gledajući me nikako ka malko sažaljivo.
Bože mili, šjora File ! Jeste i Vi niko čudno čejade: Lipo Van govorin da je mala u skulu a da je mali študent i da moradu bit svaki dan na nastavu.
Ala koji si ti matun, Marinko moj - pa jin sve viruješ....Ko zna di su oni sad ? Ma ti si isto malo onako na svoju...nikako priko svake mire naivan. Tebe i vlastita dica žednega mogu prinit priko vode - ali mene bogami ne...a ne, ne... Ni se još taki rodija koji bi šjoru Filu privarija !
A HDZ ?
Ne čačkaj mi moju ranu, sunce ti žarko...plane šjora File. Ne spominji mi moje muke, jesi li razumija ?!
Samo pitan.
Nemoj me njanka pitat ote stvari ! Dobro ti znaš da nisu oni mene nikad privarili jerbo jin nikad nisan ni dala svoj glas - unese mi se ona u lice. Omar san ji ja pročitala ! Ka da čitan otvoreni libar...e ! To ka prvo ! Ma su mi moju Lucu, i to na moje oči, prinili žednu priko vode...počme ona kršitsvoje štrkljave ruke i mavat glavon.
Pa kako joj Vi niste otvorili oči ?
Ma ne govori mi ništa ! Tek je sad došla pameti kad je počela krepavat o mižerje i nemoći....Ništa tu ja nisan mogla, sinko moj. Ka da su je učarali svi vrazi ovega svita ! Ništa mi ni virovala. Zamličili su joj bili oči i nisi joj moga utirat u glavu ništa drugo vengo HDZ pa HDZ ! Je...eno je sad došla pameti pa po vas dan skida sve svece su neba i tuče se šakon u prsi - da kako je mogla tako falit....Da kako je mogla bit takva mona. A štaš kad je bidna bila naivna i mislila je da se sam Bog bija skala su Neba. Taka ti je ona. Naivna. Ma je evo progledala...Napokon !
A ja san baš mislija kako će joj se svidit Kosoruša !
Ma nemoj da te čuje.....Omar bi te potegla cavaton u glavu.
Oli je dotle došlo ?
Dotle ! Nego ča !
Ma ča mi to govorite ?
Ajme da si vidija koji je tigar u njoj spava, Marinko moj. Ma ča Tigar ? Lav o đungle ! Zmaj ča riga vatru ! Sva se naježurin kad se sitin ča je radila isprid televizije nikidan kad je prikazalo oni dernek o hadezejski njunjora u Zagrebu.
Ma je li moguče ?
Bogati, je li moguće pa je li moguće ? Oli si i ti popizdija ? Naravski da je moguće ! Puklo je ženi sve u jedan put prid očima. Bog joj je prosvitlija pamet. Napokon ! Fala ti Gospe moja...reče šjora File i prikriži se su onin svojin suvin prstima.
A če je to šjoru Lucu tako infotalo pa je ponovo progledala ?
Da ča ? Ka da ne znaš da je ona bidna sama i da živi u teškoj mižerji. I sad gleda ona one ijade dičice ča pleskadu i mašu zastavicin, pivadu i balaju...smiju se i vesele Kosoruši - ka da je sam Spasitelj doša među svit. Gleda ti ona, Marinko moj - kako se pridsidnica o vlade litretala i kako je metnila onu svoju sliku na binu pa drži govorancije sama ispod sebe, ispod svoje bele figure i sve se zlamenuje...Ne more virovat svojin starin očima. Vidin ja da je zasuzila...ma ne od sriće vengo od muke, sinko moj.
A ča je...Pitan je ja ?
Ma pušti me File moja...Sad bi samu sebe svu izila o muke...komu san ja virovala. Ma vidiš li ti ovo, za muku Isusovu ? Vidiš li ti ovo ?
A naravski da vidin. Nisan čorava !
Meni ti, File moja, ovo sliči na one mitinge poza onega rata kad se mavalo zastavan i vikalo parole. Ma je onda narod u ništo i virova, A ča je ovo ? Dotralo dicu feratama i autobusiman da plešćedu ka nikome svon novon bogu, svon vođi - ma samo ženskomu, u vešti ! A sve gre nizbrdo - da ne more gore. A oni feštaju ! Vesele se ! Čuješ li ti ča ona govori ? Još će ji na zanju činit i da joj trčedu štafetu !
A naravski da čujen, nisan bome gluva !
Kaže da će nan pomoć, da misli na nas, da ćemo i dalje ovako.....Pa je li ona zna ča nan čini ? Pa ko nas je uvalija u ova govna ? Ko nas je operuša mavajući zastavama i vičući parole ? Pa ona i nježini ! Da ko drugi ?
Lipo besidiš, Luce moja...Ma si jin isto do jučeri ti virovala !
Jesan...nako me đava neodnija....Virovala san, virovala...praznin ričima san virovala jerbo su me bili zaslipili vako staru ! Virovala san in ! Ma nisan ja baš toliko otišla na kvasinu da čedu me jopet privarit. Prin će mi usast ruka vengo ča ću ji ja jopet zaokružit na listić !
Ča je je. I grišit je juski !
Ma ča je najgore ja tebi nisan tila dat gušta, File moja. Kontreštavala san se su tebon onako višje iz nikega dišpeta jerbo san mislila da se uvik ti činiš ka nikako najpametnija, ka oja od nas. Bila si mi se višje popela na vrj glave !
Mooolin ! Ča očeš su time reč ?
Ajde ne jidi se sad na mene. Znaš i sama da uvik mora bit po tvoju. A ovi si put pogodila ! Evo priznajen !
To mi je drago čut !
A i čorava kokoš koji put najde zrno !
Slušaj Luce, nemoj da ti sad dan jednu trisku po toj šupjoj labrnji !
Ma komu je glava šupja ?
A tebi...Da komu dugomu ? Bićen ja glasala za hadezejce ?!
I da nisu skočili oni oko njih dvi, bogami bi se bile dobro očepušale jer u nas svaki razgovor o pulitiki jema jednu granicu koju kad priđeš...ne padaju više teške riči vengo triske i šake.
Priča meni sve to šjora File, onako po svoju.....a ja je gledan u ćudu.
Vama, bome, lako poleti ruka ! Palite se na mali gas !
Ma me brzo i projde....
Je, ma nike stvari više onda ne morete vratit nazad. Triba se pazit teških riči, šjora File. Još će te natuć najbolju prijatejicu !
Ajde cukunu jedan spliski, ča ti znaš....Poslin smo selipo pomirile i izjubile. A popile smo kod nje i bićerin prošeka i pojile po fetu torte o rogači. Opet smo mi u dobre. Nego šta !
A ni vama laka, ni....šjora File moja !
Da laka ?! Ma ne znaš ti ni po mise. Ja ovod u naš portun i okolo kuće radin ka niki politiški radnik. Jeman sve više slidbenikov. Jedva čekadu da me čuju.
Asti ga miša ! Pa to ste Vi postali popularni ka nika politiška zvizda.
A ona me pogleda onako po svoju ispod oka i tiho mi, nasmijana brka, doda: U politici ti je, sinko moj, teško bit zvizda ali je zato, u ćas, lako postat p...a !!!!
|
