REŠT
Naprije ću vam se ispričat, onimi ki su čitali moje poste na mojemu bloku, zač se nisam dugo javljala i niš pisala…?
Nisam mogla, zač sam bila bombardirana iz svih mogućih oruđi i oružji, svakovim kriminalnim događanjim, a još više reakcijum misnistri i naše Jace, na istarživačko novinarstvo i otkrivanje mutikaš, lopovi i izdajic! Zame, su svi ki kradu našu mladu državu izdajice, kaj i oni ki držu lojtre i niš ne delaju protiv tega.
Ali jedan mi članak u novina upal u oko i bila sam tako zgrožena da nisam mogla mislet da je opće tako ništo moguće u bilo kojoj državi, a ipak sam imela malkoc nade, da se u mojoj to nemore dogodit…?
Prevarila se Janjo, izjalovile se moje nade, da ipak kadi, ako ne prvda, a ono nekakova pravna znanost čući u znanjim našega pravosuđa?
Ne, kaj je bilo?
Marinc, je iz rešta, preko bilježnika, sve kaj ima prenesal na svoju familiju!?
OK, kaj bi rekli Merikanci i Englezi, pa i prinam puno njih, ali recte mi molim vas , kadi je moguće takovo ništo ?
Pa kaj znači pritvor, kaj znači zatvor i rešt, pa kaj ni to više gubljenje građanskih slobod i preodgoj, kazna i pravo samo na eklementarne potribe čovika ?
Kaj je to rešt, pri nam je valja to jedan godišnji odmor, ili odmor, da se lopovi, ubojice i ini trun odmoru, da smislu nove popare za budućnost, da organiziraju bolje lopovluk u budućnosti ?
Kaj je to rešt?
Ja sam donesla odluku u dogovoru s Mijetom, da najprvlje dobro proučim zakon, da li je moguće da moj Mije naredi kakovu palamatu i projde u rešt, dobivat nejgovu pemziju, zaprav ćel on dobivat pemziju na svoj račun da ja mogu trošit te novce ili dal ću dobivat bar pol, jerbo sam i ja učestvovala u njegovem delu ! Kaj ni tako?
U reštu će Mije ništo delat i dobivat će velu zato plaću ku će isto metat na njegov račun, ili će mu dat te novce kaj je zaslužil kad mu dojde vrime za pojt van ? Za to vrime dok bude zaprit, ja ću pojt k njemu sa dicom i nuki svaki vikend, pa ćemo se lipo divanit, nosit ću mu štrudle i povitice i ono kaj voli jist, tako da vidi da je njeva familija uz njega, da nebi izgubil moral i volju bit u reštu…A zač nebi bil, danas je u modi bit u reštu i kašnje se falit kako su te maltretirli i proganjali, stoljećim, ne samo tebe van i tvoju familiju. Svi ki su u reštu veliki su ljudi, treba im pomoagat i imat sućut svake vrste za njih! Na koncu kraja, pa nemore svaki pojt u rešt? Tuj i tamo ki idiot , kaj nima novac za platiti kaznu, ili ni znal kaj ni po zakonu ? Ali večina naših kažnjeniki je lipo dobro znala kaj dela, jako dobro je sve planirala i delala sa svojim ortakim , kaj ni tako ?
Mene zanima , ki je taj bilježnik, a ki taj gruntovčan ki je omogućil da taj Marinc, kaj je opelješel svoju državu more tako ništo naredit ?
Čel se tem bilježniku i tem gruntovčanu kaj su to naredili kaj dogodit?
Jel to po zakonu i kakovem zakonu i kadi piše da se iz zatvora more tako ništo delat ?
Hiljade mi se pitanji okreće u glavi, kako iskoristit sve blagodati, kazneneg sustava, za svoje dobro, jerbo vidim da su rešti danas blagodat, da je to ništo kaj svaki pravi a naričito učen i sposoban čovik kega je politika postavila na položaj mora doživet. Ki ni dospil do rešta, taj nemore znat kaj je to čast i slava, kaj je to moral, kaj je to upornost, a naši su političari u vladajućoj garnituri silno upinju da dojdu na pravo mesto, mesto kadi će biti ugledniji neg ikad, mesto kadi će se kako velu educirat za budućnost, lipu budućnost kaj nas čeka?
Ajmo malo razmislit o temu, i reč, ki ni došal do rešta u svojem životu, ni niti domoljub niti pravi Hrvat !
Kaj ni tako, i zač onda niki iz moje familije nebi bil tamo, pa da se i meni i mojimi trun podigne ugled i budemo isto časni ljudi ?
Po temu kuliko smo bili u reštu u pritvoru i po temu kuliko smo dobili kazne od našeg pravosuđa, određivat će se naše pravo da dojdemo u budućnosti do boljeg položaja i da nas svi uvažavaju, da nam se sklanjaju i da ki začarani gledaju u nas, jerbo ispada da je rešt zapravo mesto samo za izabrane, Bogom dane , pa zač si onda niki od mojih to nebi pruštil ? Morda i ja ? Ako niš , morem kašnje pisat memoare, Janjo u pritvoru, Janjo u reštu, Janjo na sudu, Janjo kažnjena, presuda pravomoćna, pa nisam ja baš takova niš koridst valja, da nemorem dojt do rešta ?
A smislit ću ja već ništo, dico moja, videt ćete?
Ajte bok !
JANJO, 29.studenog 2009.
