NE ZNAM KAJ METNIT U NASLOV!
Nimam o čem pisat i nimam kaj za reč, sve se skliže nizbrdo ko dite na toboganu i tup u vodu, kaj god počne naša Vlada... Kaj lipega reč i kaj izmislet da vas zeru razveselim i da se u toj našoj muki nasmijete?
Rambo Milinović juriša na naše kune i dalje, valja misli da smo samo jednu reformu prošli i da je on izmislel reforme, pa da mu povirujemo da će se kaj bolje za nas rešit osim nameti. Kaj dvani da će doktorim bit bolje, to baš nas ni puno briga, kad je to njimi bilo loše, a i znaju oni prebrat, ako nimadu pacjenti odu u politiku i da vidiš kun, kulko češ?.On siromak ne vidi da mu ni njegov lipi i veliki šef Ivo, ni niš rekal o toj reformi, pušći ga da dela kaj će a onda će lipo kad reforma propade reć, «Moj Rambo iz Like, kaj si skuhal to kusaj, ajde lipo nazad u Liku operirat Tetu Maru i Kosu i pušći ministarstvo, to ni zate, ako češ već ništo sa m delat, projdi Don Kaćunku pa ćeš lipo bit ministrant ako će te zet, i to samo neradnum nediljum, kad je vrime za pojt nosit u Crikvu kune, jerbo je tako odredil naš Sabor sa većinum glasovi.
Don Ivo, poglavar od naše vlade i šef ministri, fort izbaceva našu Jadu iz paštete, zač se boji reč pred narodum ono kaj ona divani, a ona divani sve kaj on misli, pa ako projde, projde, ako ne opet dobro, pa će i njoj ondak reć, «E Jado moja kaj si konzervirala to kusaj ..!»
Kako je Rusija sa Ukrajinum zaprila pipu, već sam mislela da će se cel Zagreb i pol Hrvacke smrznit, u strahu da se neće Putin i Tomašenko smilovat i oprit, bila sam i u strahu da će naš Ivo zapovidit šefu od kase, ka je prazna, da sede na plinovod i da pušća plin kulko god more, a bilo bi jih i još kaj bi mogli delat u više smen, zač njevi plini odu u lagum, a mogli bi se dobro iskoristit, ali na nesriću ovi su brzo popušćili, zač i njimi valja triba novac i oni su se recesirali kaj i sav svit. Tako da su ipak Rusi i Ukrajinci spasili našu državu od vlastite proizvodnje plina iz unutrašnjih rezervi ku imaju naši ministri.
Stvar sa ulaskum u EU i dalje je zaštopana od negdašnje zapadne strane Balkana i to od tovariši ke su EU naguzili na izajdu sa blokadum, da nebi morali primit našu malu državu k sebi, zač se oni boju naše vlasti kaj vrag tamjana (Bog zna dal se vrag piše malim ili velikim slovum), jerbo kaj sam već par puti izdivanila, ode EU u vražju mater ako se ovi naši vladari prišlepaju na nju.
Za to vrime dok mi režimo na tovariše iz zapadneg Balkana onaj lik, kaj je nosil miće čokoladice svojem kompanjonu u Osjeku i sve putom pojil, prikopčal se na kompoziciju od HDZ-eja i sad je opet lokomotiva od Osjeka, a narod u Osjeku inače bi imel svaki treći dan izbore da se to ni dogodilo, kaj i u prošloj godini, a kaj izbori koštaju kaj dvorana za rukomet, ku je pogodil taj lik u obliku kugle kaj se uvik otkotrlja na pravo mesto, veliki je uspih HDZ-eja i vladajuće koalicije.
Ja više neznam kaj se grdega sve ni dogodilo u ovoj Državi, grdega za narod, a tako smišnega za one kaj znaju mislet da više dalje o tim bedastoćam i nemorem pisat.
Prelazim na mačkare i mačkaranje pa ću reć ako bude kakove prilike uć bi se ja i moja kompanija maskirali.
Moj Mije bil bi naš Ive saborčan maskiran u parnjaču, dost mu je sličan, ima fanj brke i baš je onako mal kaj on, ja bi ga nafutrala z vatum pa bi bil i lip okrugal, ma isti ki naš mašinovođa, diplominirani inženjer saobraćaji i vez, na njega bi bila ja prikopčana istom nafutrana i sa žuto-srebrenim brki u liku našega Begonje, ki ja bi bila tender na kemu se vozi vuglen, zač nam drugi energenti nisu dostupni, Ive od moje Mare bil bi mali vagonćić za prevoz i transport vridnih pošiljki, a bil bi pretvoren u našega Tonetu R. isto nebi divanil ni crne ni bele, samo bi zrikal i gledal u narod i divanil, «Ja sam dogradonačelnik, ja sam dogradonačelnik….!».
Moja Mare bila bi vagončić kaj bi bil umaskiran u glasnogovornicu od grada Ogulina, ka bi imela malo okno po izgledu na kompjuter i ona bi bila desno a za rukicu bi vodila našu Francu, ka bi bila sa leve strane, jerbo je ona borac za pravdu u HDZ-eju. Gluha teta Roža bila bi jedan teretni stočni vagon u kemu bi bilo ništo glasači HDZ-eja ki bi pivali zborno "HDZ-ej zna, HDZ-ej zna"….. i dirigirale bi malo jedna Poljačka, malo druga i Sanjica od Drenšeki, jerbo su one mlade snage od ove zahuktale lokomotive ka vozi Ogulinski svit derekt u EU, ali preko Italije jerbo je preko Slovenci zabranjeno ić sa takovum tehnologijum, i mogli bi nas ne propušćit kako je to već njihov običaj. Svi oni zajedno i složno, vozili bi mala kolca sa kuglagerim na kim bi sidel naš Banana, smijal se nježno kroz bradu i brke, a njeva bi Duda na tim istim kolcim stala sa megafonum i navistila narodu Ogulinskem velike i značajne promene koje bi se mogle dogodit ako slučajno zaustavu ovu kompoziciju ka juri u 5 brzini, i preklinjala sav narod da se mičedu s puta jerbo se to čudo nikako ne more zaustavit.
Ali vrag (Bože, pomozi mi da saznam dal se vrag piše veliko il malo) i Mesopust neznaju za šalu, pa bi se većnik Bokulić u prvem činu, zamaskiran u Luku Šamana bacil pod jureću parnjaču i usporil apokaliptičnu brzinu našega jurećega vlaka, njega bi glumil od moje sestre Ivke muž, zač je istom tako koščat pa nebi morala futrat.
Pošto to nebi smelo glavneg šofera Ivetu, tj mojega Mijetu i celu tu garnituru, tj našu vlast, tj moju družinu, u drugem činu bi Mijeće ćeri sestre sin u liku Gospodina svemogućega i sveznajućega Igle zabol smrtni udar u samo telo tj. lokomotivu ka se ni tila zaustavit da spasi svojeg dugogodišnjeg Šamana i svekolikog vernika svih ver u Hrvati, ke je brzo i temeljito apsolviral i krenil u alternativu i tako se siromak zakopal u kompot od bunike.
Ako ni to nebi moglo zaustavit tu jureću grdosiju, zadnji i smrtonosni pokušaj zaustavljanja jureće garniture kroz Ogulin zaustavit će gospon Janko, ki se slučajno zove ki Janko kaj je došal "dockan" na Kosovo polje spasit "kolevku" od turčini, kada bi moglo dojt do strašne detonacije, zač je on tulko nafutran energijum razvoja, da bi to moglo imat efekt atomske bombe i raznest sve u vražju mater. To bi mogal odigrat moj najstariji nuk, on bi mogal lipo odglumit gospna Janka, zač on isto tako fort pregovara za nekakova pslovna partnertva kaj narečeni gospon.
To bi moglo raznest našu lipu kompoziciju u hiljadu komadi, ostala bi samo kolca na kim se vozil naš Banana netaknuta i Duda sa megafonum na ustimi ali bez teksta!
Sve bi to na jednem štafelaju, risala naša gospa Lovrić i ta bi slika kašnje stala na jednem zidu u Velikoj vićnici našega malega grada, ki opomena da niki nesmi krenit takovum brzinum u razvitak i prosperitet, jerbo se to onda tako tragično završi. Ta bi slika morda kašnje, kad ipak zajdemo u EU, seguro dospila u Brisel, kaj remek-djelo i prikaz strahote ku je Hrvacka preživela zbog svoje lude vožnje da stigne drugi bolji svit. Gospu Lovrić, odglumila bi moja nevesta Dorica, kaj je naklonjema umetničkem miljeu i puno drži do njih.
Ja mislim da bi naša maskirana kompanija odnesla sve prve nagrade, za temu, za kostime i za umitnički dojam.
Ajte bok!
JANJO, 23. siječanj 2009.
