SRETNA NOVA 2009.GODINA!
Mislela sam malo, kakovu bi čestitku poslala građanim i seljakim mojega malega grada, nebi rad bit kaj Vlada i ministri pritit, dost sam se tega uvoj naslušala!
Dosadno je ovih dani, samo se ji i pije, kanda nas niš grdega ne čeka, a tako će projt i doček Nove. Puno nas imat će lipo blagostanje, a puno njih sa strahum će u mrzlem, bolni i čemerni dočekat Novu 2009. Uvik je tako bilo, uvik je niki imal, a niki ni, a sad puno ima njih kaj niš nimadu osim dugovanji i neizvesnosti.
Pa lipi moji ja ću Vam svim poželit, sretniju Novu godinu, bože daj propala reforma od zdravstva i Milinović dal ostavku, Bože daj da tužu državu Ustavnem sudu ki imaju zemlju ka im se more zet i bože daj sud dobili, Bože daj da prodamo naša brodgradilišća i da dalje deladu, neka nam prodela poduzetnička zona i da dojde bar 10 novih poduzeći u Ogulin, neka se naredi odbrana od poplavi, neka dojde plin u naš mali grad, neka prestane dimit iz Sodola, neka prodela kanalizacija, neka nebude vode po cestam kad kiša pada, neka se opozicija pojača ma ka bila, zač je ovako predosadno, neka Bego počne normalno divanit, neka nam dica budu zdrava, neka političari počnu mislet kaj deladu, neka profunkcionira pravna država, neka doktori počnu ličit narod, neka se opru sve tajne i laži, neka narod počne složno živet, neka nam lipo proleće dojde da moremo delat, neka sve rožice procvitadu i neka lipe iz Firenze brzo rastu da imamo malo lada u gradu, neka nedilja bude slobodna i neradna a da niki ne dobi otkaz, neka nam dica dobro uču, neka nam niki ne priti više jerbo i više nima s čim, neka ne palu strasti protiv Slovenci, neka se smiru lopovi i prestanu krast, neka političarim bude dost ovo kaj su nam zeli, neka dica i dalje dobivadu besplatne knjige, neka niki ne ubije nikega radi novac, osvete i mržnje, neka svi dojdu iz celega svita letovat pri nam i kupat se u našem moru, nek se dogovru naši političari da će od sad pošteno delat i divanit, da će delat za svoju državu i svoj narod, da se neće pucat po grdovim, razbijat i krast i ubijat, neka nam godina bude rodna, neka puno dice na svit dojde, nek svi budu siti, čisti i zdravi, pošteni, veseli i mirni, nek je sretna ova Nova 2009 !
Bože daj ne imela ja kega špotat u 2009 godini!
Ajte bok!
Janjo, 31.prosinac 2008.
