TAMA IZ SVITLOSTI
Četvrtak večer krenili Mije i ja prošetat zeru kroz grad , divanili malo o našim prijateljim, da bi svrnili k njimi, i tako nogu na nogu došli do konfekcije i ja vidim iz dealeka ništo svička. Ma bilo mi malo prešaro za svitla od auti i motori, nikako mi i ni pasalo da svićka od tudaj i pitam Mijetu , kaj to Mije blišči, morda ti bolje vidiš ?
-Neznam Janjo, ništo kanda svićka na sitno, morda kakova svitlosna priredba, ili kako veli lajt šou na otvorenem, morda se kaj dogaja da ti Janjo nisi upućena ?
-Mije kaj se sprdaš smanum, pa nemorem ja sve znat, , ma Mije moj, to je ništo čudno s boka na komitetu, kadi su sad sve naše stranke, da ni to slučajno kakov leteći tanjur ili kaj , kaj velu da će dojt do 2012, baš do kad su oni nacrti za procvat Ogulina našega zakazani? Da nisu oni došli ništo ranije, par godin, zać se divani i piše da će bit gusto te godine, a mi smo sve isplanirai naredit do tih godin, čel nam ki pomutit plan?
-Joj, Janjo, kad češ prestat ćitat te bestoće po interneti i te svakove gluposti,?
-Ma Mije moj, to su ovi iz HDZ-eeja deli svitlosnu reklamu kanda su prašak za robu ili Koka-kola, bog ih ubil njiov, jerbo s pravim nimadu seguro veze kako divanu ..
Ajme sprdnje, pa to izgleda kaj cirkus, Bože oslobodi ciganije i rugla, morda su se podilili pa sad čedu da se zna koji je del njiov, ili kaj, mislim ja, a Mije muči i mući.
Mije, sad nemorem gledat ni na jednu stranu, ,s leve strane me tuče goli park a sa desne strane blišči kaj u disku. Pa više nemoreš na miru ni kroz grad prokorzirat da te ništo ne tuče! I baš svitli tako da nemorem gledat u tu stranu kako sam se zavitovala, neg moram gledat u onu nagrdu od gradilišta u parku, moram gledat kako su nam i Tomu zapetonirali, o ljud moji kaj nisu bile lipše one sitne rožice oko njega, a svašta im na pamet padne, morda su zato to i deli da svitli da gledamo u tu grdoću preko ceste….
Pa kaj bi bilo da s prednje strane dene HSLSLS( a bože slobodi, kad krenem divanit kraticu od te stranke nikako se nemorem zaustavit i stat na četri slova ) na desno svoju žutu lajt svitlećeu reklamu, pa da dene SDP-ej nigdi prikuje svoju crvenu reklamu, pa da seljaki denu svoju zelenu reklamu, pa sve to da okolo nakitu Sindikati, pa kaj još nečemo morat u tem ludem gradu durat.
Bilo bi lipše da su ono jezero na ulazu pred plac popetonirali i deli ploču sa spomenikum da je to HDZ-ej popetoniral od svojih skromnih sredstav nego kaj su to nakitili. Mislim da bi hitro i druge stranke morale naredit ništo jer ovako je to nelojalna konkurencija, kako se to reče, zač i oni imaju pravo na reklamiranje svojih proizvodi, jerbo su to sve profitne sttranke skup sa sindikatum kaj ubire članarinu kaj i ovi a niš ne dela. Ja hitno preporučam svim strankam kaj se nalazu u toj kući da hitro organizairaju metanje i postavljanje svojih reklami zač će izgubit sve mušterije, jer ova reklama tuče točno u mozak. Još da su deli i onu svoju pismu HDZ-ej zna da beči kaj ono kad nakit piva Božićne pisme onda bi to bil jedan ukusan i kvalitetan projekt. Niki nebi niš drugo ni mislel bar dvi ure osim HDZ-ej zna, zna…
-Janjo kadi se ti gasiš, dal moraš uvik imat posla sa timi strankami i sa politikum, kega vraga će ti to ?
-Da, ja bi trebala samo rombat po Rašiću, prat vam gaće i kuhat i peć strudle i masnice, ma Mije organizirat ću klub i stranku protiv muških ako me buš dušil i daval zabrane i iskat ću da mi daju kakov šprinkajzl u toj kući i det ću na krov reklamu da smo tuj i da smo odlučile stat toj muškoj strahovladi na kraj, zač mi je već tih bedastoći od tih stranki i od vas lenih muških dost. Ne zijaj name, van se lovi kakove politike i kakovega organizairanja, vrime leti a ti samo čekaš pemziju i računaš na prihode od mojega placa, a vidi kako se dela i napredjuje u politiki, bar da iščeš da ti dadu posal da čuvaš tu reklamu da je niki nebi razbil po noći, pa bi stukal ku kunu.
-Žačepi Janjo, muči zač ću ti zažbukat ovum šakum usta da neš više nikad meni divanit kaj moram delat!
-I ,kako ja znam svojega Mijetu, kako znam da mu je dogorelo do nokti i da ga svrbi dlan, kako znam da sila boga ne moli, ja zamučim. I kako ću ja sad mirno prokorzirat čez svoj grad, kaj je šundran na sve strane, kako ću ja mučat o temu i to sve durat, kad mi ništo kaj drugi naredu uvik pokvari moj lipi bračni život da se moram s Mijetum pravdat. Lipo smo se okrenili na peti za 360 stupnjevi, krenili doma brzim korakum bez divana i tako ništo kaj je lipo i nježno počelo grdo se završilo. Došli smo dona, spremili smo se leć, okrenili jedan drugem leđa, a da ni bilo te svitlosti morda bi se noć kako lipše završila. A kaj moreš, nekad nas i svitlost baca u tamu.
Jutros sam se tužna probudila, isprićala sve mojoj Mari, a moja Mare vili meni:
-Janjo, imaš svoj blok, lipo to sve deni na blok, kad se memoreš sa svojim čovikom podivanit o tem kaj te muči, reci svimi pa nek znaju kaj ti misliš. Tako je to, dico moja, ispada da nigdi nikega nimam ,van taj svoj blok kadi morem govorit o našim jalovim poslim.
Ajte bok!
Janjo, 22. kolovoz 2008.
PS (Potlje svega): Kad sam videla da je Uska staza napisal na svojem bloku istu temu, malo sam se razvedrila, jerbo nisam sama. Morda je moj Mije i mislel o kupleraju ali ni til reč pred manum, zač se onda seguro nebi zaustavila u svojem divanu i moral bi primenit grubu silu..
