Priča…
Veliki dažd udrija s neba.
Danima ne pristaje, lije li ga lije.
More se počelo pomalo dizat, poplavilo rivu, došlo do prvih kuća.
Svit se počeja polako kupi put brda, svak je ponija ča je moga.
Ive ribar, jedini osta u mistu koje je već bilo sablasno prazno.
Kad je more probilo u prizemlje popeja se na prvi pod.
Uto mu dolazi prijatelj Luka s kajićem i zove ga,
…Iveee, Iveeeee, di si… oma da si doša s menom u kajić, utopit ćeš se…
Ive iz kamare s prvoga poda odgovara,
…Molaj me Luka, aj ča, ništa mi neće bit, čuva Bog Ivu svog…
Ode Luka, tužan ča ga prijatelj nije posluša.
Ma nevrime ne posustaje, sve veće more se diže, Ive lagano kupi stvari sa prvega poda i pripomisti se na drugi pod.
Uto evo opet Luke koji nikako da se pomiri sa činjenicom da mu se prijatelj može utopit.
I zove Luka opet,
…Iveee, Iveeeee, di si… oma da si doša s menom u kajić, utopit ćeš se…
Ive iz kamare s drugog poda odgovara,
…Molaj me Luka, aj ča, ništa mi neće bit, čuva Bog Ivu svog…
I ode Luka ča po drugi put, cili žalostan ča ga prijatelj nije posluša.
Nesritnje vrime nikako da se smiri, lije kiša s neba a more prodire odozdal ka nika beštija iz samega crnoga pakla.
Nima druge, Ive ostavi sve i popne se na krov.
Ma nije se on utaman popeja evo opet Luke dovesla bidan u kajću vas mokar,
…Ive za milog Boga, ča si poludija, oli ne vidiš da češ se utopit. Skoči u kajić i bižmo ča…
Ive se stisnija oko fumara i odovara Luki,
…Molaj me Luka, aj ča, ništa mi neće bit, čuva Bog Ivu svog…
Luka ga zadnji put pogleda, zasuze mu oči ča će izgubit dragog prijatelja i teškoga srca odvesla natrag put brda.
Nije kiša stala, ni se more fermalo podizat i Ive se utopija.
U isti čas se naša u redu prid Bogom da mu prisudi je li za u raj ili pakal.
Kad je skonta ča mu se dogodilo, sve je počeja sebi ronjat u bradu,
…E Bože moj ja se toliko ufa u Te a Ti me ostavija na cidilu…
I sve tako s noge na nogu, čekajući u redu mrsi sam sa sobom.
Sluša ga Bog priko uva i kad je Ive doša na red, Bog mu govori,
…No dobro, što se tebi dogodilo kad toliko negoduješ…
…Da ča… u suzan će Ive …ja se toliko ufa u Te, toliko vire ima, a Ti me ostavija da se utopim…
…Ma čekaj… govori Bog …Koji si ono ti…
…A Ive ribar… odgovara Ive
Pogleda Bog u libar i ništo traži i kad je naša reče,
… A Ive moj dragi, pa tri puta sam slao Luku po tebe…
…Kraj priče
Čuješ li me Ive, zadnji put ti govorim, ulizi u kajić.
Pozdrav,
Tvoj Luka.
Zdravi i veseli bili.
|