Evala svitu, evo me u trku da se samo javin ča je bilo jučera.
I sami znate da se sve ove dane vrtilo okolo tega Valentinova.
-Odnia in vrag i tu modu od tega praznika ča su sad izumislili za izmust poštenon čoviku zanju paru!- ronja je moj Frane ove dane. Ukinulo osmi marta, a vidi sad ovo.
Prija bi se makar mi muški naslavili.- (To je mislia na lokanje-jo kako volin te eufemizme! )
Bili mi neki dan u grad.
-Ma vidi gospe ti ovega -pokazuje na nekog čovika koji je upravo pomno proučava rozi svileni ređipet- popizdia načisto. Oli mu je potriba činit te monade o' sebe? Vi'š ti ča učine reklame i cili taj cirkus o' tega Valentinova. I molin te, ča jedan svetac ima sa ređipetima?- ( To je u redu, i ja se pitan.)-Ja san čovik stareg kova, ne obadajen ja to.-
Jesi moj Frane, mislin se, puno si mi star i vas si porebambia. Zaboravia si ča je bilo lani. Ko je meni ono dariva seksi ređipet i mudantice, a? Ča je bilo iza tega, a?
Došli doma, Frane oma po televiziji da mu čagod ne utekne. Voli biti informiran, njegova gesla. Sanja šou ni nego počea, kadli reklame.
-Asti gospu, zaboravit ču ča je bilo dok svrše reklame. A i ova srca, idu mi više na jetra! Di se god okreneš sama srca!-
I tako dođe jučer to Valentinovo. Zove me Frane na posal:
-Čuješ, ja ti tia kupit barenko ružu (a, tu smo, pokleknia i ti) ma se sve prodale. ( Ovdi ja zakovitlan očima, ne moren virovat da je takva pomama) Alo, ča je, ča mučiš, oli si se namusila? Ma jubice moja, misli tvoj Frane na te, isto san nešta naša…
I ča mislite da san dobila?
JETRICU!!!
Kaže da nije tija srce, tija je nešta oriđiđi…pa šta, i to je organ.
P.S. Ista je svršila na žaru , a i ja kad je reka da nije tija srce jerbo njegovo odavno iman…
|
